ہے بہاراں میں خزاں حاصل خیال عندلیب
ہے بہاراں میں خزاں حاصل خیال عندلیب
رنگ گل آتش کدہ ہے زیر بال عندلیب
عشق کو ہر رنگ شان حسن ہے مد نظر
مصرع سرد چمن ہے حسب حال عندلیب
حیرت حسن چمن پیرا سے تیرے رنگ گل
بسمل ذوق پریدن ہے بہ بال عندلیب
عمر میری ہو گئی صرف بہار حسن یار
گردش رنگ چمن ہے ماہ و سال عندلیب
منع مت کر حسن کی ہم کو پرستش سے کہ ہے
بادۂ نظارۂ گلشن حلال عندلیب
ہے مگر موقوف بر وقت دگر کار اسدؔ
اے شب پروانہ و روز وصال عندلیب