کیا ضعف میں امید کو دل تنگ نکالوں
کیا ضعف میں امید کو دل تنگ نکالوں
میں خار ہوں آتش میں چبھوں رنگ نکالوں
نے کوچۂ رسوائی و زنجیر پریشاں
کس پردے میں فریاد کی آہنگ نکالوں
یک نشو و نما جا نہیں جولان ہوس کو
ہر چند بمقدار دل تنگ نکالوں
گر جلوۂ خرشید خریدار وفا ہو
جوں ذرہ صد آئینۂ بے زنگ نکالوں
افسردۂ تمکیں ہے نفس گرمی احباب
پھر شیشے سے عطر شرر سنگ نکالوں
ضعف آئنہ پردازی دست دگراں ہے
تصویر کے پردے میں مگر رنگ نکالوں
ہے غیرت الفت کہ اسدؔ اس کی ادا پر
گر دیدہ و دل صلح کریں جنگ نکالوں