کس کا خیال آئنۂ انتظار تھا

کس کا خیال آئنۂ انتظار تھا

ہر برگ گل کے پردے میں دل بے قرار تھا

کس کا جنون دید تمنا شکار تھا

آئینہ خانہ وادی جوہر غبار تھا

جوں غنچہ و گل آفت فال نظر نہ پوچھ

پیکاں سے تیرے جلوۂ زخم آشکار تھا

ایک ایک قطرے کا مجھے دینا پڑا حساب

خون جگر ودیعت مژگان یار تھا

اب میں ہوں اور ماتم یک شہر آرزو

توڑا جو تو نے آئنہ تمثال دار تھا

کم جانتے تھے ہم بھی غم عشق کو پر اب

دیکھا تو کم ہوے پہ غم روزگار تھا

دیکھی وفاے فرصت رنج و نشاط دہر

خمیازہ یک درازی عمر خمار تھا

گلیوں میں میری نعش کو کھینچے پھرو کہ میں

موج سراب دشت وفا کا نہ پوچھ حال

ہر ذرہ مثل جوہر تیغ آبدار تھا

صبح قیامت ایک دم گرگ تھی اسدؔ

جس دشت میں وہ شوخ دو عالم شکار تھا