نہ چھوڑو محفل عشرت میں جا اے میکشاں خالی

کمیں گاہ بلا ہے ہوگیا شیشہ جہاں خالی

نہ دوڑا ریشۂ دیوانگی صحن بیاباں میں

کہ تار جادہ سے ہے لجہ ریگ رواں خالی

دکان ناوک تاثیر ہے از خود تہی ماندن

سراسر عجز ہو کر خانہ مانند کماں خالی

محبت بے نوا ساز فغاں در پردۂ دل ہا

کرے ہے مغز سے مانند نے کے استخواں خالی

عبث ہے خط ساغر جلوہ طوق گردن قمری

مئے الفت سے ہے میناے سرو بوستاں خالی

نہ پھولو ریزش اعداد کی قطرہ فشانی پر

عزیزاں ہے برنگ صفر جام آسماں خالی

اسدؔ ہنستے ہیں میرے گریہ ہاے زار پر مردم

بھرا ہے دہر بے دردی سے دل کیجیے کہاں خالی