مری ہستی فضائے حیرت آباد تمنا ہے

مری ہستی فضائے حیرت آباد تمنا ہے

جسے کہتے ہیں نالہ وہ اسی عالم کا عنقا ہے

خزاں کیا فصل گل کہتے ہیں کس کو کوئی موسم ہو

وہی ہم ہیں قفس ہے اور ماتم بال و پر کا ہے

اثر فریاد دل ‌ہاۓ حزیں کا کس نے دیکھا ہے

نہ لائی شوخی اندیشہ تاب رنج نومیدی

کف افسوس ملنا عہد تجدید تمنا ہے

تغافل مشربی سے ناتمامی بسکہ پیدا ہے

نگاہ ناز چشم یار میں زنار مینا ہے

تصرف وحشیوں میں ہے تصور ہاۓ مجنوں کا

سواد چشم آہو عکس خال روئے لیلا ہے

محبت طرز پیوند نہال دوستی جانے

دویدن ریشہ ساں مفت رگ خواب زلیخا ہے

کیا یک سر گداز‌ دل نیاز جوشش حسرت

سویدا نسخۂ تہ بندی داغ تمنا ہے

ہجوم ریزش خوں کے سبب رنگ اڑ نہیں سکتا

حنائے پنجۂ صیاد مرغ رشتہ بر پا ہے

اسدؔ گر نام والائے علی تعویذ بازو ہو

غریق بحر خوں تمثال در آئینہ رہتا ہے

اثر سوز محبت کا قیامت بے محابا ہے

کہ رگ سے سنگ میں تخم شرر کا ریشہ پیدا ہے

نہاں ہے گوہر مقصود جیب خود شناسی میں

کہ یاں غواص ہے تمثال اور آئینہ دریا ہے

عزیزو ذکر وصل غیر سے مجھ کو نہ بہلاؤ

کہ یاں افسون خواب افسانۂ خواب زلیخا ہے

تصور بہر تسکین تپیدن ہاۓ طفل دل

بہ باغ رنگ ‌ہائے رفتہ گل چین تماشا ہے

بہ سعی غیر ہے قطع لباس خانہ ویرانی

کہ ناز جادۂ رہ رشتۂ دامان صحرا ہے

مجھے شب ہائے تاریک فراق شعلہ رویاں میں

چراغ خانۂ دل سوزش داغ تمنا ہے

ترے نوکر ترے در پر اسدؔ کو ذبح کرتے ہیں

ستمگر ناخدا ترس آشنا کش ماجرا کیا ہے

بہ بزم مے پرستی حسرت تکلیف بیجا ہے

کہ جام بادہ کف بر لب بہ تکلیف تقاضا ہے

نشاط دیدۂ بینا ہے کو خواب و چہ بیداری

بہم آوردہ مژگاں بوسۂ روئے تماشا ہے

نہ لائی شوخی اندیشہ تاب درد نومیدی

کف افسوس سو دن عہد تجدید تمنا ہے

نگہ معمار حسرت ہا چہ آبادی چہ ویرانی

کہ مژگاں جس طرف وا ہو بہ کف دامان صحرا ہے

نہ سووے آبلوں میں گر سرشک دیدۂ نم سے

بہ جولاں گاۂ نومیدی نگاۂ عاجزاں پا ہے

بہ سختی ہائے قید زندگی معلوم آزادی

شرر در بند دام رشتۂ رگ‌ ہائے خارا ہے

اسدؔ یاس تمنا سے نہ رکھ امید آزادی

گداز آرزو ہا آبیار آرزو ہا ہے