فرصت آئینہ صد رنگ خود آرائی ہے
فرصت آئینہ صد رنگ خود آرائی ہے
روز و شب یک کف افسوس تماشائی ہے
وحشت زخم وفا دیکھ کہ سر تا سر دل
بخیہ جوں جوہر تیغ آفت گیرائی ہے
شمع آسا چہ سر دعوی و کو پاے ثبات
گل صد شعلہ بیک جیب شکیبائی ہے
نالہ خونیں ورق و دل گل مضمون شفق
چمن آرائے نفس وحشت تنہائی ہے
بوئے گل فتنۂ بیدار و چمن جامۂ خواب
وصل ہر رنگ جنوں کسوت رسوائی ہے
شرم طوفان خزاں رنگ طرب گاہ بہار
ماہتابی بکف چشم تماشائی ہے
باغ خاموشی دل سے سخن عشق اسدؔ
نفس سوختہ رمز چمن ایمائی ہے
اگ رہا ہے در و دیوار سے سبزہ غالبؔ
ہم بیاباں میں ہیں اور گھر میں بہار آئی ہے