عیادت سے زبس ٹوٹا ہے دل یاران غمگیں کا
عیادت سے زبس ٹوٹا ہے دل یاران غمگیں کا
نظر آتا ہے موے شیشہ رشتہ شمع بالیں کا
صدا ہے کوہ میں حشر آفریں اے غفلت اندیشاں
پئے سنجیدن یاراں ہوں حامل خواب سنگیں کا
بجاے غنچہ و گل ہے ہجوم خار و خس یاں تک
کہ صرف بخیۂ دامن ہوا ہے خندہ گلچیں کا
نصیب آستیں ہے حاصل روے عرق آگیں
چنے ہے کہکشاں خرمن سے مہ کے خوشہ پرویں کا
بوقت کعبہ جوئی ہا جرس کرتا ہے ناقوسی
کہ صحرا فصل گل میں رشک ہے بت خانۂ چیں کا
تپیدن دل کو سوز عشق میں خواب فرامش ہے
رکھا اسپند نے مجمر میں پہلو گرم تمکیں کا
اسدؔ ارباب فطرت قدر دان لفظ و معنی ہیں
سخن کا بندہ ہوں لیکن نہیں مشتاق تحسیں کا