سیر آں سوئے تماشا ہے طلب گاروں کا

خضرؔ مشتاق ہے اس دشت کے آواروں کا

سر خط بند ہوا نامہ گنہ گاروں کا

خون ہدہد سے لکھ نقش گرفتاروں کا

فرد آئینہ میں بخشیں شکن خندۂ گل

دل آزردہ پسند آئینہ رخساروں کا

داد خواہ تپش و مہر خموشی بر لب

کاغذ سرمہ ہے جامہ ترے بیماروں کا

وحشت نالہ بہ وا ماندگی وحشت ہے

جرس قافلہ یاں دل ہے گرانباروں کا

پھر وہ سوئے چمن آتا ہے خدا خیر کرے

رنگ اڑتا ہے گلستاں کے ہوا داروں کا

جلوہ مایوس نہیں دل نگرانی غافل

چشم امید ہے روزن تری دیواروں کا

اسدؔ اے ہرزہ درا نالہ بہ غوغا تا چند

حوصلہ تنگ نہ کر بے سبب آزاروں کا