خشکی مے نے تلف کی مے کدے کی آبرو
خشکی مے نے تلف کی مے کدے کی آبرو
کاسۂ دریوزہ ہے پیمانۂ دست سبو
بہر جاں پروردن یعقوب بال چاک سے
وام لیتے ہیں پر پرواز پیراہن کی بو
گرد ساحل ہے نم شرم جبین آشنا
گر نہ باندھے قلزم الفت میں سر جاے کدو
گرمی شوق طلب ہے عین تا پاک وصال
غافلاں آئینہ داں ہے نقش پاے جستجو
رہن خاموشی میں ہے آرایش بزم وصال
ہے پر پرواز رنگ رفتۂ خوں گفتگو
ہے تماشا حیرت آباد تغافل ہاے شوق
یک رگ خواب و سراسر جوش خون آرزو
خوے شرم سرد بازاری ہے سیل خانماں
ہے اسدؔ نقصاں میں مفت اور صاحب سرمایہ تو