جو نہ نقد داغ دل کی کرے شعلہ پاسبانی

جو نہ نقد داغ دل کی کرے شعلہ پاسبانی

تو فسردگی نہاں ہے بہ کمین بے زبانی

مجھے اس سے کیا توقع بہ زمانۂ جوانی

کبھی کودکی میں جس نے نہ سنی مری کہانی

یوں ہی دکھ کسی کو دینا نہیں خوب ورنہ کہتا

کہ مرے عدو کو یارب ملے میری زندگانی

بہ گمان قطع زحمت نہ دو چار خامشی ہو

کہ زبان سرمہ آلود نہیں تیغ اصفہانی

بہ فریب آشنائی بہ خیال بے وفائی

نہ رکھ آپ سے تعلق مگر ایک بد گمانی

نظرے سوئے کہستاں نہیں غیر شیشہ ساماں

جو گداز دل ہو مطلب تو چمن ہے سنگ جانی

بہ فراز گاہ عبرت چہ بہار و کو تماشا

کہ نگاہ ہے سیہ پوش بہ عزائے زندگانی

بہ فراق رفتہ یاراں خط و حرف مو پریشاں

دل غافل از حقیقت ہمہ ذوق قصہ خوانی

تپش دل شکستہ پئے عبرت آگہی ہے

کہ نہ دے عنان فرصت بہ کشاکش زبانی

نہ وفا کو آبرو ہے نہ جفا تمیز جو ہے

چہ حساب جانفشانی چہ غرور دلستانی

بہ شکنج جستجوہا بہ سراب گفتگوہا

تگ و تاز آرزوہا بہ فریب شادمانی

نہیں شاہراہ اوہام بجز آنسو رسیدن

تری سادگی ہے غافل در دل پہ پاسبانی

چہ امید و نا امیدی چہ نگاہ و بے نگاہی

ہمہ عرض نا شکیبی ہمہ ساز جاں ستانی

اگر آرزو ہے راحت تو عبث بہ خوں تپیدن

کہ خیال ہو تعب کش بہ ہوائے کامرانی

شر و شور آرزو سے تب و تاب عجز بہتر

نہ کرے اگر ہوس پر غم بے دلی گرانی

ہوس فروختن ہا تب و تاب سوختن ہا

سر شمع نقش پا ہے بہ سپاس ناتوانی

شرر اسیر دل کو ملے اوج عرض اظہار

جو بصورت چراغاں کرے شعلہ نرد بانی

ہوئے مشق جرأت ناز رہ و رسم طرح آداب

خم پشت خوشنما تھا بہ گزارش جوانی

اگر آرزو رسا ہو پئے درد دل دوا ہو

وہ اجل کہ خوں بہا ہو بہ شہید ناتوانی

غم عجز کا سفینہ بہ کنار بے دلی ہے

مگر ایک شہپر مور کرے ساز بادبانی

مجھے انتعاش غم نے پئے عرض حال بخشی

ہوس غزل سرائی تپش فسانہ خوانی

دل نا امید کیونکر بہ تسلی آشنا ہو

جو امیدوار رہیے نہ بہ مرگ ناگہانی

مجھے بادۂ طرب سے بہ خمار گاہ قسمت

جو ملی تو تلخ کامی جو ہوئی تو سرگرانی

نہ ستم کر اب تو مجھ پر کہ وہ دن گئے کہ ہاں تھی

مجھے طاقت آزمانی تجھے الفت آزمانی

بہ ہزار امیدواری رہی ایک اشک باری

نہ ہوا حصول زاری بجز آستیں فشانی

کروں عذر ترک صحبت سو کہاں وہ بے دماغی

نہ غرور میرزائی نہ فریب ناتوانی

ہمہ یک نفس تپش سے تب و تاب ہجر مت پوچھ

کہ ستم کش جنوں ہوں نہ بقدر زندگانی

کف موجۂ حیا ہوں بہ گزار عرض مطلب

یہی بار بار جی میں مرے آئے ہے کہ غالبؔ

کروں خوان گفتگو پر دل و جاں کی میہمانی