جس دم کہ جادہ دار ہو تار نفس تمام
جس دم کہ جادہ دار ہو تار نفس تمام
پیمایش زمین رہ عمر بس تمام
کیا دے صدا کہ کلفت گم گشتگاں سے آہ
ہے سرمہ گر درہ بہ گلوے جرس تمام
ڈرتا ہوں کوچہ گردی بازار عشق ہے
ہیں خار راہ جوہر تیغ عسس تمام
اے بال اضطراب کہاں تک فسردگی
یک پر زدن تپش میں ہے کار قفس تمام
گزرا جو آشیاں کا تصور بوقت بند
مژگان چشم دام ہوئے خار و خس تمام
کرنے نہ پائے ضعف سے شور جنوں اسدؔ
اب کے بہار کا یونہی گزرا برس تمام