تنک ظرفوں کا رتبہ جہد سے برتر نہیں ہوتا
تنک ظرفوں کا رتبہ جہد سے برتر نہیں ہوتا
حباب مے بصد بالیدنی ساغر نہیں ہوتا
عجب اے آبلہ پایان صحراے نظر بازی
کہ تار جادۂ رہ رشتۂ گوہر نہیں ہوتا
خوشا عجزے کہ عاشق جل بجھے جوں شعلۂ خامش
کہ کم از سرمہ اس کا مشت خاکستر نہیں ہوتا
تماشاے گل و گلشن ہے مفت سربجیبی ہا
بہ از چاک گریباں گلستاں کا در نہیں ہوتا
نہ رکھ چشم حصول نفع صحبت ہائے ممسک سے
لب خشک صدف آب گہر سے تر نہیں ہوتا
نہ دیکھا کوئی ہم نے آشیاں بلبل کا گلشن میں
کہ جس کے در پہ غنچہ شکل قفل زر نہیں ہوتا
صفا کب جمع ہوسکتی ہے غیر از گوشہ گبری ہا
صدف بن قطرۂ نیساں اسدؔ گوہر نہیں ہوتا