بس کہ جوش گریہ سے زیر و زبر ویرانہ تھا
بس کہ جوش گریہ سے زیر و زبر ویرانہ تھا
چاک موج سیل تا پیراہن دیوانہ تھا
داغ مہر ضبط بے جا مستی سعی سپند
دود مجمر لالہ ساں درد تہ پیمانہ تھا
وصل میں بخت سیہ نے سنبلستاں گل کیا
رنگ شب تہ بندی دود چراغ خانہ تھا
شب تری تاثیر سحر شعلۂ آواز سے
تار شمع آہنگ مضراب پر پروانہ تھا
موسم گل میں مئے گلگوں حلال مے کشاں
عقد وصل دخت رز انگور کا ہر دانہ تھا
انتظار جلوہ کاکل میں ہر شمشاد باغ
صورت مژگان عاشق صرف عرض شانہ تھا
حیرت اپنے نالۂ بیدرد سے غفلت بنی
راہ خوابیدہ کو غوغائے جرس افسانہ تھا
کو بوقت قتل حق آشنائی اے نگاہ
خنجر زہراب دادہ سبزۂ بیگانہ تھا
جوش بے کیفیتی ہے اضطراب آرا اسدؔ
ورنہ بسمل کا تڑپنا لغزش مستانہ تھا